வார்த்தையுடனான உறவு
நான் வார்த்தைகளை
நேசிக்கிறேன்
வார்த்தைகள்
எனக்கு ஒரு உலகை
சிருஷ்டித்து தருகிறது
மூச்சு முட்டிஇறக்காது
தவிக்கும் நேரங்களில்
சில வார்த்தைகள்
நாசியில் காற்றுபோல
இறங்குகிறது
ஒன்றுமே தெரியாத
இருள்வெளியில்
மனம் விரும்பும் ஒரு
பெண்ணாக
நெருக்கமாக நடந்து வருகிறது
சில நேரங்களில்
மதுரஸம் போல
போதை தருகிறது
பசித்திருக்கும்பொழுது
உணவாக ருசி ஏறி
வயிற்றில் நிறைகிறது
பல நேரங்களில்
மொழியின் பிடியில் சிக்காது
உணர்வின் அணைப்பில்
கதகதப்பேறி
மனவெளியில் அலைகிறது
அனுபவவெளியில் பெருகும்
ரஸத்தின் சாற்றை
மொண்டு வரும் வார்த்தைகள்
தீராத கடல் முன்
சிறுவர்களின்
விளையாட்டுச் சொப்புபோல
பேரழகுகொள்கிறது
No comments:
Post a Comment